Ruiz: Aruba lo no cumpli cu norma di Caft pa 2017 y 2018

ORANJESTAD – Aruba lo no cumpli cu norma di CAFT pa 2017 y tampoco 2018, cu ta un deficit di .5%. Asina minister di finanza Xiomara Ruiz a confirma den un conferencia dialuna mainta. Ruiz a pinta un cuadro financiero basta negativo, cu segun e mandatario ta e realidad financiero amargo cu gobierno anterior a laga atras. A papia di un deficit di 155 miyon florin, y cu tin cu bay busca pa fia 338 miyon florin pa paga debe na comienzo di 2018.

DEFICIT

Ruiz a mustra riba e buraco di 130 miyon florin cu Aruba ta cera cune pa 2017. A reparti e suma den tres fase, unda cu e suma mas grandi ta e 73 miyon florin cu ainda no a haya di e refineria, 7 miyon di inkomsten belasting y 50 miyon di winstbelasting. Sumanan cu segun Ruiz, no a logra cobra ainda y cu ta haci cu na tur, e ta suma 130 miyon florin.

FIANZA

Mientras cu ta trahando pa bin cu un presupuesto pa 2018, e dianan aki lo drenta un ley pa wordo trata den parlamento pa gobierno por subi mercado y busca e suma di 338 miyon florin pa paga su debe na comienzo di otro aña (2018). Segun Ruiz, no tin problema pa haya fianza, pero mirando nos situacion, e fianza lo por bin cu interes hopi halto compara cu otro islanan cu ta haya fianza cu ayudo di Hulanda. Ainda Aruba no ta hayando asistencia di Hulanda di esaki pasobra segun Hulanda, Aruba ainda no a cumpli suficiente pa por ehecuta e asina yama ‘witte donderdag accoord’, cu ta implica cu Hulanda ta asisti Aruba y yuda nan haya interes abou riba prestamo internacional.

DOWNGRADE

Mirando e situacion cu tin aworaki, Ruiz no ta descarta cu nos isla por haya un ‘downgrade’ financiero di instancianan internacional mirando kico tur nos ta pasando aden. E no a specifica con y ni di ken, pero si cu Aruba tin e risico awor di haya un ‘downgrade’, cu ta nifica cu e ta afecta posibel inversionnan di inversionistanan internacional cu ta haya un señal ‘negativo’ di nos isla financieramente.