Minister ta ‘garantisa cu diplomanan no ta na peliger’

ORANJESTAD – ‘ Na ningun momento e balor of reconocemento di nos diplomanan ta na peliger’. Asina minister Michelle Hooyboer-Winklaar a reacciona dialuna riba e noticia di NoticiaCla.com riba e problema cu tin cu e fundacion cu ta maneha Colegio Aruba, referente e asunto di diploma y e posibel perdemendo di balor di esaki. Segun e mandatario, e ta lamenta cu a publica esaki sin ta bon informa cerca e instancianan concerni prome cu a publica e informacion. Segun e mandatario, e articulo ta basa completamente riba un carta di un directiva di scol, esta directiva di Colegio Arubano, sin busca pa confirma esaki cu Gobierno di Aruba, Gobierno di Hulanda of cualkier Universidad na Hulanda.  “ Minister Hooyboer-Winklaar ta haya e acto aki di e directiva di scol hopi iresponsabel, mirando cu ta mal informa comunidad y ta causa panico innecesario cerca hobennan y mayornan. Minister Hooyboer-Winklaar ta mira esaki como un tactica pa desvia atencion for di e plan di e scol pa cera porta pa mas studiante di MAVO” e comunicado como reaccion ta sigui bisa. Como tal, e situacion entre e fundacion y e mandatario ainda no ta resolvi. 

E mandatario sinembargo den e comunicado, ta garantisa cu ‘ na ningun momento e balor of reconocemento di nos diplomanan ta na peliger’. E titular di enseñansa ta menciona cu e proceso di aanscherping exameneisen HAVO/VWO ta wordo guia den un forma responsabel y cu Ministerio di Enseñansa, Cultura y Ciencia di Hulanda (OCW) den un reaccion preliminar ta reacciona positivo cu e stapnan cu Aruba a tuma y ta tumando pa por sigui garantisa e “gelijkwaardigheid” di e diplomanan di HAVO y VWO.

E mandatario ta referi na e protocol di 2012 cu Aruba a firma cu Minister di Enseñansa di Hulanda riba diferente tereno incluyendo e parti di e examen y diplomanan di HAVO/VWO. “ Na e momento ey Aruba tabata e unico di e demas islanan di reino cu a firma e protocol mustrando asina cu Aruba ta pro activo y cu nos tin un compromiso serio cu e calidad di nos enseñansa. Mientras tanto Sint Maarten tambe a firma un protocol similar cu esun entre Aruba y Hulanda/OCW. Aruba y Hulanda a palabra un introduccion di e cambionan den fase pa asina duna Aruba e espacio pa na un manera responsabel por defini kico precies mester ahusta y na ki manera lo haci e ahustacionnan necesario. “

Segun e mandatario, na november 2013 Departamento di Enseñansa a comunica un parti di e ahustacionnan aki caba den cuadro di aanscherping di exameneisen HAVO/VWO. Den e carta di Departamento di Enseñansa ta poni specificamente e ahustacionnan y termino di implementacion di e cambionan pa ambos HAVO y VWO. Pa por completa e proceso di aanscherping exameneisen a instala na comienso di aña un comision AVO bou di guia di Departamento di Enseñansa y cu participacion di e diferente partners pa asina haya input di tur esunnan concerni y pa discuti y defini hunto e cambionan cu ainda ta necesario pa Aruba.

E comision AVO ta consisti entre otro di representantenan di Examenbureau, Afdeling Curriculum Ontwikkeling, AvondHavo, Colegio San Nicolas y Colegio Arubano. E resultado di e comision aki ta un proposicion cu a ser presenta na Minister Hooyboer-Winklaar na juni ultimo y cu a ser sosteni pa e mandatario. Un carta oficial hunto cu e proposicion y un descripcion di e proceso a ser manda pa Director General di OCW na Hulanda dia 26 di juni ultimo. Den espera di e reaccion oficial di Hulanda a tene diferente “video conference” cu Ministerio di OCW caminda cu Hulanda ta mustra cu nan ta hopi positivo cu e stapnan cu Aruba ta tumando. A base di e carta cu Aruba a manda tabata tin peticion for di Hulanda pa algun informacion adicional y mientras tanto a facilita OCW cu e informacion necesario. Ministerio di OCW ta indica cu nos por ricibi reaccion oficial di nan parti den transcurso di e dianan nos dilanti pero ya nan ta duna “greenlight” pa nos sigui cu e proceso cu nos ta bezig cune.

“Nos a compronde cu e directiva di scol cu a ocasiona tur e conmocion aki no ta respeta e palabracionnan haci den e comision AVO ni tampoco e liñanan di comunicacion existente. Nan kier mas influencia den e decisionnan cu ta wordo tuma y ta busca contacto directo cu Minister di Enseñansa y hasta cu Ministerio di OCW na Hulanda” e comunicado na nomber di minister ta bisa. Minister Hooyboer-Winklaar, segun ec comunicado, mientrastanto a manda un carta pa e directiva di scol aki mustrando nan riba nan luga den e asunto aki. Minister Hooyboer-Winklaar ta bisa den e carta cu ta reconoce e rol importante di e directiva di school como un di e stakeholders den e proceso aki, pero cu finalmente ta Ministerio di Enseñansa y Departamento di Enseñansa ta responsabel pa maneho di enseñansa pa pais Aruba.

Pa mas informacion Minister ta referi e directiva di scol bek na nan mesun representantenan den e comision AVO pa asina nan por pone nan mes na altura di e ultimo desaroyonan y palabracionnan haci. Tambe Minister ta duna e directiva di school den e carta e conseho pa haci bon palabracion interno riba e parti di comunicacion y compartimento di informacion mirando cu ta dunando e impresion cu internamente mes nan no ta riba un linea. 

“Colegio Arubano ta scoge pa pone enfasis solamente riba ki porcentahe di studiante ta slaag na Colegio y drenta enseñansa superior na Hulanda y ta link esaki cu e nivel di capacidad ora nan drenta Colegio Arubano. Pues miho e studiante ta manera nan yega Colegio, mas chens nan tin pa slaag y sigui studia na Hulanda. Nos ta kere cu tur studiante cu demostra potencial merece e mesun chens ey, esey ta e tarea di Colegio Arubano. Si Colegio Arubano pone e focus riba prepara hobennan miho durante nan añanan na scol, mas mucha lo ta exitoso. Como un scol cu ta uza fondonan publico, decisionnan di e scol no por ta den man di e scol so, si no ta cuadra cu interes general di nos pais.” E mandatario a bisa finalmente.