Walk out di ambulance no tabata necesario ni corecto

ORANJESTAD – Ningun momento sindicato (cu ta representa trahadonan di ambulance, esta ABV) a notifica minister di salud cu tabatin problema den e servicio. “Mi tabata sa si (pa medio di e director di IMSAN) cu tabatin cierto precupacion e intrankilidad. Pero no cu e tabata dje alarmante ey manera cu nan ta bisa”. Minister di salud Alex Schwengle a reacciona na NoticiaCla.com dialuna riba e walkout di e trahadonan di ambulance diabierna ultimo. “Just walk out no tabata necesario ni corecto” e mandatario ta bisa di e loke e trahadonan a haci.

Mientrastanto, te cu dialuna atardi, e mandatario no a ricibi ningun documentacion di e situacion di ambulance, aunke cu e la pidi esaki. E mandatario ta dispuesto pa sinta na mesa pero e ora mester pone tur cos riba papel, y asina cuminsa discuti e situacion di ambulance. E ta bisa mesora si cu no spera si cu por bay pidi p.e un cantidad di ambulancenan nobo pasobra ‘no por haci esaki aworaki”. Pero otro cosnan por papia ariba, manera e situacion di espacio cu supuestamente ta mucho chikito. “Por drecha e lugar y hacie mas grandi of ta busca un otro lugar” e mandatario a sigui bisa. Pa aworaki e mandatario tin un reunion pendiente cu Raad van Toezicht di IMSAN, e director, hefe di ambulance y tambe sindicato ABV.

E hecho cu sindicato kier un contesta dentro di dos siman, unda cu mester bin cu un plan van aanpak, no ta realistico segun e mandatario. Por cuminsa papia si, pero no pa keda cla den dos siman. “Esey no kier men cu e ta bay dura 2 luna tampoco” e mandatario a sigui bisa. Ademas e declaracion cu a manda varios carta pa e minister, tampoco ta berdad segun Schwengle.