Containernan cu clapchi lo yega Aruba te aki dos siman

ORANJESTAD – E 19 containernan cu clapchi na caminda pa Aruba e aña aki ta yega laat. Asina experto di explosivo Rubin Ponson a confirma durante un conferencia di prensa riba clapchi. Segun Ponson, nan mester a yega prome cu december, pero awor ta poni pa yega te dia 13 di december, cu ta 2 dia leu di e ultimo dia cu nan por yega Aruba. Esey ta nifica cu tin chens cu pa dia 27 di december no tur e containernan aki por sali riba mercado na tempo. Ademas polis a informa cu di e 81 permisonan pidi, entre 8 pa 10 lo keda nenga, pasobra nan no a cumpli cu e reglamentonan den pasado.

TARDANSA

Ponson durante e conferencia, a mustra cu e 19 containernan mester a yega Aruba caba, pasobra pa regla nan mester ta na Aruba prome cu december. Pero e cargamento ta riba lama ainda y lo dura te por lo menos 13 di december prome cu nan yega. Banda di e 19 containernan, tin 4 cu ta na e deposito di Wela ainda cu por wordo uza e aña aki ainda. E problema ta cu mirando e tempo laat cu nan ta yega, no tin garantia cu tur e containernan cu yega dia 13 di december, por sali riba mercado. E comision lo basa su mes prome riba esnan cu a yega cu nan documentonan prome na ordo. Pero asina mes no ta garantia cu tur lo por sali pareu, pues lo tin containernan cu lo sali mas laat cu otro, debi cu e containernan a yega laat. E trabou cu tin, ta cu mester controla tur e 19 containernan pa contenido, pa verifica si tur clapchi cu t'ey, ta na ordo y legal. Ta ora cu nan ta cla, e ora numa por saca nan for di Wela dia 27 di december.

BENTA

Vocero suplente di polis Liliana Rasmijn a bisa cu for di momento cu solo sali dia 27 di december, hende riba 12 aña por cumpra clapchi, te 9’or di anochi. Y pa loke ta tiramento di clapchi, por tira te dia 1 di januari 1’or di merdia. Despues di esey, ta prohibi pa tira clapchi y polis por multa esnan cu toch ta sigui tira. Pa loke ta esnan cu ta bende, esaki tin regla tambe. Nan mester bende den container, y dependiendo di e grandura di e container, por tin un cantidad limita di personal. P.e si tin un container di 20 pia, por tin 3 trahado, y den un container di 40 pia, por tin 5 hende, pero no mas cu esey. Banda di esey tin un cantidad di regla mas cu e bendedor tin cu tene cuenta cu ne.