Gobierno y SABA a haya otro porfin

ORANJESTAD – Gobierno y SABA (Stichting Algemene Bejaardenzorg Aruba) a haya otro siman pasa porfin. Minister di Salud dr Alex Schwengle a confirma dialuna na NoticiaCla.com cu durante un reunion siman pasa cu e Raad van Toezicht di e fundacion, partidonan a papia riba e problemanan cu a surgi recientemente y cu nan a haya otro. A reconoce cu declaracionnan haci tabata fuerte di ambos banda, y cu despues di cierto cambio, cu lo por tin un solucion cu ambos por biba cune.

E declaracionnan haci pa e director sr Rokebrand tabata fuerte unda cu a anuncia cu si no haci nada, den 6 luna e fundacion ta failliet, pero e declaracion ey a wordo haci pa ‘pone presion’ riba gobierno di Aruba. “Di mi parti mi ta admiti cu mi tabata mucho ‘pushy’ y cu mi mester ta menos ‘pushy’’ e mandatario a sigui bisa NoticiaCla.com. A palabra cu lo tene reunionnan cu otro cada siman of pasa siman, y na october lo haya e plachi financiero di e fundacion.

Tambe a palabra cu na october awor lo instala e asina yama Ouderdom Zorg na Volksgezondheid, cu tin cu haya como e tarea pa ehecuta e plataforma Ouderdomzorg. Lo inventarisa tur loke tin y no tin, y kico mester. “Inverti blindelings no ta e solucion”. E minister a bisa cu e lo kier pa por tin tur e placa na mundo pa inverti y paga tur cos pa tur cuido, pero e no por hunga Sinterklaas.

E intencion segun Schwengle ta pa mehora e control tambe di gobierno riba e instancianan di cuido, y percura pa expande e servicio den man di otronan, cu solamente gobierno. Gobierno lo percura pa tin e control debido pa garantisa cu tur esnan cu ta duna servicio na nos grandinan, haci esaki cu e cuido manera mester ta. Pero no por ta asina, segun Schwengle, cu gobierno tin cu ta responsabel pa tur e cuido aki.