Romero: Buelo di Aruba Airlines pa Bonaire ta yuda competencia baha prijs

KRALENDIJK – E hecho cu Aruba Airlines a cuminsa bula pa Bonaire, ta nifica competencia pa e otro aerolineanan. Asina minister di transporte di Aruba Chris Romero a bisa NoticiaCla na ocasion di e buelo inaugural diaranson. Segun Romero, bo ta haya awor tarifanan competitivo, cu sigur lo beneficia comunidad di Aruba. Tambe e buelo ta beneficioso den tempo ya cu mayoria di nan ta buelonan directo. “Den e aspecto ey so, e ta algo sumamente positivo pa Aruba” Romero a bisa.

KLM

Tambe loke segun Romero ta importante ta cu awor ta trahando pa establece un relacion cu KLM pa crece e turismo for di Europa. Tin un turismo di 8 pa 10 % di Europa segun Romero. Cu e coneccion for di Bonaire cu KLM, por engrandece e turismo for di Europa, cu Romero ta considera e turista potencial di calidad cu ta gasta mas hopi.

COMERCIO

Un otro grupo cu ta beneficia di e buelo, ta comercio segun e mandatario. Romero a compronde cu tin critica di comerciantenan cu ta biaha frecuentemente entre e islanan, cu nan no por hacie frecuentemente pasobra mester ‘overnight’ na Corsou y/of e tarifa ta mucho halto, papiando di mas cu double. Y tambe e tempo di buelo ta mas cortico den tempo.