Tarifa halto y falta di coneccion a pone Aruba Airline bula pa Bonaire

ORANJESTAD/KRALENDIJK – Tarifa halto, falta di oportunidad pa bishita famianan entre e dos islanan ta entre e motibonan cu Aruba Airlines a opta pa restablece nan buelo pa Bonaire e siman aki. Asina un di e gerentenan di e aerolinea Frank Arends a splica. Aruba Airlines a efectua su buelo inaugural pa Bonaire diaranson, un dia cu e buelo comercial mes cuminsa dia 30 di november. Un bombardier yena cu invitado, ehecutivonan di e aerolinea y prensa a yega Bonaire den oranan di mainta, y a keda ricibi cordialmente pa ehecutivonan di e isla, prome na aeropuerto (pa e.o. gezaghebber Edison Rijna) y despues na e restaurant na Rincon, Posada Para Mira. Aki e ehecutivonan di e aerolinea a splica e motibo di e buelo durante un conferencia di prensa.

ZVK

Arends a splica cu nan ta asisti tambe cu e buelonan medico di e compania ZVK cu tambe a acudi na e aerolinea pa percura pa e buelonan medico. Ta trata di buelonan cu ta transporta hende pa Aruba y Corsou pa motibo medico. E aerolinea ta bulando 2 biaha pa siman pa e compania ZVK di Bonaire, cooperando cu e parti medico. Na januari tin un plan pa por brinda mas stul pa e tipo di servicio aki cu ta necesario pa esnan malo.

2018

Pa otro aña si cos bay bon, Aruba Airlines tin pensa di cuminsa aumenta e frecuencia pa Bonaire, dependiendo con cos bay aworaki. A gradici pa e confiansa pa por cumpra pasashi pa ehecuta e buelonan.

SHOPPING NIGHT

Aruba Airlines ta organisa diabierna 1er di december un shopping night di 6 or pm pa 10 or pm y riba cada compra di pasashi ta risibi 10% descuento y te forma cu Aruba Airlines ta yama danki na e pueblo di Aruba pa e sosten duna durante e aña aki, lo tin musica en bibo pa deleita e publico presente y un bar y cushina bon surti cu cuminda navideño