Gobierno di Aruba ta decreta dia nacional di luto

ORANJESTAD:- Conseho di Minister y a yega na algun conclusion rond di e caso lamentabel di e morto di e dos criaturanan e ultimo dianan aki y a informa di nan decision riba e tema aki. Na prome luga gobierno di Aruba lo decreta un dia nacional di luto e dia di entiero di e dos muchanan pa asina e comunidad di Aruba completo para keto y reflexiona riba loke ta sosodiendo den nos pais y riba con y unda nos kier hiba e pais aki y kico nos por haci pa evita cu algo asina sosode atrobe. Gobierno di Aruba ta haci un apelacion pa tur departamento di Gobierno pone nan bandera halfstok.

Ta haci tambe un apelacion na Departamento di Enseñansa pa instrui scolnan pa trata e tema di abuso di mucha pa asina tur e hobennan cu ta bayendo scol nunca lubida e storia doloroso aki. Y pa tur nos muchanan y hobennan cu ta pasando den un situacion similar sinti cu tin hende cu tin oido na nan dolor y cu ta cla pa yuda nan. Especialmente, nos muchanan mester sinti y realisa cu biba den abuso no ta algo normal. Y cu nan por tin e confiansa cu ora nan wordo abusa, nan por haya e curashi y papia sin miedo di nada.

Prome Minister Evelyn Wever-Croes ta haci un invitation na pueblo pa bin hunto riba e dia nacional di luto pa convivi cu e famia y henter comunidad den e dolor profundo cu e hecho aki a laga atras y tambe pa expresa e deseo cu nos tur tin cu nos kier pa algo mas wordo haci pa stop abuso di mucha.