Presonan den KIA por asisti cu prome auxilio

ORANJESTAD – Sinta ta scucha cu hopi atencion con pa yuda bo prohimo den momento di accidente of calamidad. Cuater preso, representando practicamente tur departamento di e instituto coreccional, a haya un chens pa siña ‘prome auxilio’ den fin di siman. Cu e speransa cu dia algo sosode den KIA mes, por conta riba nan pa ayudo medico. Dos dia despues, 8 ora di curso, tin 4 preso cu awor por bula aden si tin mester, pa duna ayudo di prome auxilio. Sigur un novum pa prison na Aruba.

E idea ta original di Cruz Cora na Irlandia den e prison eynan, unda cu a logra establece cu e programa aki di envolvi preso, a logra reduci agresividad y bringamento cu resultado den hincamento cu 90%. Hefe di Cruz Cora na Aruba, Michel La Haye, a acerca KIA pa un posibilidad y e resultado tabata fenomenal. Unabes cu KIA a acepta e plan, a cuminsa busca e presonan adecua y a bin selecta 5 (1 a cay afo) preso, tur cu un castigo largo, cu a haya e chens aki. E motibo pa scohe presonan cu castigo largo segun miembro di staf Sjarisca Agunbero, ta pasobra e ora por inverti den personanan cu por wordo uza pa tempo largo. No tin sentido inverti den persona cu castigo cortico, y despues un rato nan no tey mas. A sigui pa busca uno di cada ‘afdeling’ pa asina tin e garantia cu riba cada afdeling tin un persona cu sa prome auxilio’. Ademas nan mester tabatin un record ‘no problematico’. E presonan mes tabata hopi entusiasma, a siña hopi y tur a gradua tambe pa e prome curso di prome auxilio. E lesnan tabata intenso, parti den dos biaha 4 ora parti den dos dia. Gastonan tur a wordo cubri pa Cruz Cora, pero ta spera cu den futuro, por haya sponsors pa por cubri e gastonan necesario.

Un di e presonan cu NoticiaCla a papia dune, “Maurits”, a mustra di ta hopi contento cu e la haya e chens. “Mi a haci hopi malo den comunidad. Mi tabata envolvi cu droga. Esaki ta mi chens pa haci algo bek pa comunidad”, e la sigura. Y e hecho cu e ta sera, no ta nifica cu e no ta bay yuda un otro preso, of te hasta un cuidado di preso. “E por ta mi pio enemigo, pero na momento cu e mester di un ayudo, mi lo dune e ayudo aki”. KIA asina por a mira bek riba un otro curso exitoso.