Fundacion Hende Muhe den dificultad a cancela resto di actividad

ORANJESTAD – Fundacion Hende Muher den Dificultad a cancela resto di actividadnan planea relaciona cu e Oranje Ribbon Week, y lo tene nan riba un otro fecha den futuro. Esaki ta inclui e evento di diahuebs y diabierna, y tur otro actividad cu tabatin relaciona cu e siman. Presidente di e fundacion Suzy Kock a confirma esaki pa NoticiaCla diaranson anochi. E motibo ta cu mirando tur loke a pasa riba e tereno di violencia e ultimo dianan aki, no ta apropia pa celebra nada aworaki. Kier duna e pueblo e espacio pa ta den trankilidad y procesa e asuntonan aki. Mes momento a bisa cu esnan a cumpra carchi pa e eventonan cu ta sigui e siman aki, por yama e fundacion y nan lo haya nan placa reembolsa. E eventonan no ta wordo cancela, sino simplemente ‘posponi’ Kock a bisa.