Emsley Tromp sorprendi cu OM ta apela sentencia di caso Saffier

WILLEMSTAD – Ex director di Banco Central di Corsou y St Maarten, Emsley Tromp a keda sorprendi cu ministerio publico ta bay apela e sentencia contra su caso, esta caso Saffier. Asina abogadonan di e bankero, Mirto Murray y Niels van der Laan a informa pa medio di un comunicado. Nan ta laga sa cu via prensa Tromp a bin compronde cu OM a dicidi di no entrega y lo apela e sentencia di dia 17 di November. Despues OM mes a confirma segun e abogadonan.

SORPRENDI

Segun e abogadonan, mirando e contenido di e sentencia ta bon motiva y extensivo (32 pagina), el a keda sorprendi cu e decision (di ministerio publico pa apela). “Ta di lamenta cu e sentencia di huez no a pone ministerio recapacita riba su forma di actua. Un actuacion cu pa un aña y mei a causa hopi daño na reputacion di Tromp”. Nan ta mustra cu Tromp den pasado a bisa varios biaha cu e tin tur confianza den e proceso aki. “Y mirando e sentencia di corte, e confianza aki ta completamente hustifica” e abogadonan a finaliza bisando. Foto cortesia Dick Drayer.