Vaders: Hecho cu a laga Paul Croes liber awor, ta bisa hopi

WILLEMSTAD – “Nos tur sa cu un persona cu ta sospecha di algo hopi fuerte, no ta bay cas”. Asina abogado di ex minister Paul Croes, Marije Vaders a bisa NoticiaCla diamars atardi. E hecho cu Croes ta liber, ta bisa hopi segun su abogado di Corsou. Aunke cu Croes a recobra su libertad temporal recientemente, te ainda e abogado no a haya tur documento di e caso Ibis di ministerio publico, pa e por prepara su caso pa su cliente. E intencion ta cu prome cu e caso bin dilanti, lo Vaders haya tur resto di documento pa por prepara pa e caso. Loke tambe ta cuestiona, ta e grandura di e caso. Segun e abogado, e loke cu OM tin, no ta mes serio cu nan ta pretende cu e ta.

SORPRESA

“Na mi opinion personal, e caso no ta manera ministerio publico a presentele” Vaders a cuminsa na bisa. A bisa berdad cu a haci un investigacion grandi, pero no ta locual nan ta pretende cu a sali afor. Cu esey, Vaders a splica cu e acusacionnan cu a keda treci dilanti, ta mucho pisa compara cu e material cu tin contra dje. “Ami personalmente ta haya cu ta masha tiki cos contra meneer Croes a wordo presenta” Vaders a sigui bisa. E cargonan cu a keda presenta ta cargonan mescos y no a cambia. “Mi no ta bisa cu e cargonan no ta klop. Mi ta djis bisa cu na mi parecer, pa cada cargo, nos tin un defensa y splicacion. Ta keda na huez pa dicidi kico e ta haya di e caso y sea si algo a bay robez of no. E hecho caba cu sr Croes a wordo poni den libertad, ta bisa basta caba” Vaders a bisa. Si tabatin algo hopi fuerte, nos tur sa cu un persona cu ta wordo sospecha di algo hopi fuerte, no ta bay cas. Keda pendiente pa mas informacion.