Minister a clarifica declaracion 'contradictorio' den caso Eugene

ORANJESTAD – Den un caso unda cu tin cantidad di informacion ta circula y unda cu esaki ta bin constante, por bin confusion dado momento. Y ta e confusion awe mainta a conduci cu na prome instante minister di husticia Andin Bikker a declara den un conferencia di prensa, cu e mayornan di e criatura Frans no tabata kier a coopera cu e investigacion, siendo cu ta danki na e confesion di e mayornan, cu a localisa e curpa awe mainta. Segun Bikker berdad awe mainta el a bisa cu mayornan no tabata kier a coopera cu e caso. Pero algun ora despues el a bin compronde cu cos a cambia, y cu e informacion consecuentemente a cambia. Pesey a bin e confusion cu a parse como cu e noticia duna tabata conflictivo. Segun e mandatario, e ta wordo mantene informa, pero no ta haya e detayenan di e caso. “Ora cu mi a tene e conferencia di prensa awe mainta, esey tabata e informacion cu mi tabata tin. Den transcurso di awe mainta mas lat, pa merdia mi a wordo notifica di e resultado final y pesey a bin un tiki confusion” Bikker a sigui bisa.