Bikker: Mayornan di criatura victima di maltrato no ta cooperando

ORANJESTAD – E mayornan di e criatura cu a perde su bida siman pasa a consecuencia di maltrato, no ta cooperando. Por lo menos e padrastro, mientras cu e mama ta dunando cierto cooperacion. Asina minister di husticia Andin Bikker a informa awe mainta durante un conferencia di prensa. E mayornan a keda deteni diabierna relaciona cu e investigacion di e caso cu a haya e nomber “Eugene”. Un dia despues di e detencion ey, a detene e wela di e criatura. No ta conoci si e wela ta cooperando.

BUSKEDA

E buskeda pa e criatura perdi di 3 aña ta continua ainda. Pero pa awe tardi 3’or ministerio publico y e team investigador lo dicidi si ta sigui cu e buskeda of no. Asina minister di husticia Andin Bikker a informa den un conferencia di prensa awe mainta. Segun e mandatario, a opta pa para e buskeda anteriormente pasobra despues di a check na algun adres, no a haya nada. Foto cortesia Hilario Doncker