Gobierno tin 14 dia pa splica CAft con lo yega norma di deficit

ORANJESTAD – Gobierno di Aruba a haya 14 dia pa convence e colegio di supervision financiero CAFt cu gobierno lo ‘logra’ yega e norma stipula di deficit pa 2017, y cu e meta ‘ainda’ ta uno realizable. Asina e colegio a informa minister di finanza Xiomara Ruiz den su reaccion riba e raportahe di e di 3 cuartal. Segun Caft si di otro banda Gobierno confirma na e colegio, cu no ta logra yega e meta, nan mester indica kico e metanan adicional ta e ora pa compensa pa e deficit menasante. Ambos accion ta basa riba nan respectivo leynan di Laft.

IMPUESTO

E rapport di 6 pagina ta relata un cantidad di punto cu gobierno mester splica y coregi pa por logra metanan stipula. Entre e puntonan, NoticiaCla ta mustra atrobe riba e parti di impuesto y e falta di coleccion di esaki. Segun CAFt, e entradanan di impuesto riba entrada (loonbelasting) y BBO no a mustra un aumento segun a pronostica den e presupuesto di 2017. Caft a bisa den su comentarionan riba e dos raportahenan anterior caba, cu e pronosticonan ta mucho halto y dificilmente realizable. “Ambos impuesto den comparacion cu 2016 a aumenta, pero no ta mustra e subida cu ta necesario pa por realiza e pronostico pa 2017. Como tal CAFT ta pronostica un deficit di mas of menos 50 miyon florin na e impuestonan menciona. Por lesa e comentarionan completo AKI.