Analisis: Tres siman y nada nobo riba asesinato di Sarahi Sierra

Diabierna tabata tres siman cu e hoben Sarahi Sierra a keda cruelmente asesina den su cas. Y ta netamente riba e dia aki, Aruba a keda sacudi atrobe cu un caso, unda cu un criatura di apenas 5 aña, ta perde su bida, pa loke ta mustra maltrato serio. Y e no por keda simplemente na 'un otro caso'. Aruba no por permiti pa esaki bira e norma di simplemente resolve e casonan, despues cu nan caba sosode. Y si no haci algo awor,  esaki lo bay den e direccion ey. Pa loke ta e caso di Sarahi, ainda no tin ningun detencion, of pista cu por comparti publicamente. Por lo menos no segun e canalnan oficial. Inoficial NoticiaCla a compronde cu polis a sigura cu nan lo ‘no descansa te ora cu nan tin e caso resolvi’. Na dos ocasion nan a pidi ayudo publicamente. Y for di ministerio publico a compronde cu tips ta drentando ‘tur dia’. Pero mucho mas no ta conoci, pa no bisa, nada. E famia mes ta den un scuridad pa loke ta informacion, y ta resa solamente pa e malechornan of pio ainda, e burdugo(nan), cu a comete e acto horendo aki, keda deteni.

Den comunidad por sinti un angustia, ansha, miedo y tambe rabia pa e silencio cu tin riba e caso, y hopi ta papia cu nan no kier laga e caso aki ‘muri’, manera ta cu e otro casonan, cu simplemente muri. Un di nan cu ta bin na mente ta e caso di e conocido personalidad Johnny “Poentje” Castro.

RECOMPENSA

Sugerencia cu e portal aki a tende hopi menciona, ta e posibilidad pa ofrece un suma cuantioso como recompensa pa cualkier persona cu por tin un tip di oro riba e caso aki. Ta conoci cu polis ta traha su forma di tactica, y cu nan ta haciendo tur posibel pa logra gara e persona(nan). Di otro banda, e frustracion cu no ta tende nada, hopi biaha ta surpasa cualkier pasenshi y razonamento normal. “Con tin hende cu por pensa pa comete actonan asina cu un mucha muher asina hoben. Kico por a conduci un persona pa yega asina leu” ta preguntanan cu ta keda murmura tur dia den comunidad.

Un siman mas leu, y nada ainda. E famia a puntra, te ki ora y cuanto mas tin cu warda, prome cu por haya un indicacion minimo cu tin ‘algo’ sosodiendo cu ta duna nan e ‘chispa’ di speranza cu e caso aki por haya un solucion. Algo, ta mas cu nada, nan ta bisa. Si ta recompensa mester duna, laga esey ta e forma. Algo cu no ta inusual, y sigur na su lugar, contal cu e caso aki keda resolvi. Cada siman y dia cu pasa, ta un siman y dia cu e famia tin cu sufri mas.