Presupuesto 2018 no ta keda cla pa 15 di december

ORANJESTAD – Prome minister Evelyn Wever Croes no ta kere cu e presupuesto ta keda cla pa 15 di december 2017, manera ley ta prescribi. Asina e la confia na NoticiaCla.com, aunke e no a ‘echt’ toca e tema mas amplio. “Pero si bo puntrami, no tin un manera cu e begroting 2018, cu un extra buraco financiero di 195 miyon, ta keda cla pa 15 december manera ley ta prescribi” Wever a bisa e portal aki awe mainta. Y si tene na cuenta cu 15 di december ta exactamente aki tres siman, ta mustra cu esaki enberdad no ta bay keda cla.

TRAYECTORIA

Pa e presupuesto por keda cla y entrega na Caft pa 15 di december segun e ley ta prescribi, e mester a cana su trayecto. E presupuesto no ta cla ainda na Directie Financien. Despues e tin cu bai Caft (2 pa 3 siman) y despues RvA pa despues e bay Parlamento cu mester di un tempo pa studi’e. “Ami no ta mira cu e ta haalbaar. Pero mi no a haya e ultimo posicion di Minister di Finanzas ainda riba dje. Dus mi ta warda cu duna un opinion” Wever a bisa den un reaccion breve. Loke tambe Wever a splica e portal aki ta cu nan ta reuniendo tur dia cu Directie Financien pa wak con nan por sali afo di e problemanan.