Aruba ta e prome cu e concepto Super Do It Center na mundo

ORANJESTAD – Despues di un aña di preparacion, diahuebs anochi Super Do It Center a habri su porta oficial na Shaba. Un momento sigur emocional ora cu papa Ponson a haya e honor pa corta cinta di e prome supermercado di su estilo na mundo, den compania di 150 empleado y famia fiel, sigur pa e concepto mundial di ‘Do It Centers’ mundial. Gerente general y motor tras di e proyecto di famia Frans Ponson a confirma cu Aruba ta tin e prome concepto aki, di un supermercado den un Do It Center y si e resulta exitoso, e ta bira un concepto mundial. Loke ta haci e supermercado mas special, ta cu e ta uno totalmente local, maneha pa un famia local, y trahadonan local.

CONCEPTO

Ponson a confesa na NoticiaCla cu e idea tabata di dje, esta pa hinca un supermercado completo den e tienda grandi di departamento. Ora cu el a confronta e compania madre di e concepto Do It Center, nan a yame pa loco, pero a bay di acuerdo y a patenta e concepto. Mientras cu tin entre 3 pa 4 mil Do It Centers na mundo, tin solamente un Super Do It Center, cu ta situa na Aruba. E ta diferencia di tur otro supermercado, den e sentido cu aki berdaderamente bo ta haya tur tur cos. Mientras cu varios supermercado tin e concepto principal di ta un supermercado y cu posibilidad chikito pa tin otro artefacto, Super Do It Center tin un supermercado completo, fuera di nan specialidad di tin surtido grandi di tur otro artefacto necesario. Como tal Ponson ta considera esaki como un one stop shop berdadero, unda cu un cliente ta haya tur tur cos. E horario tambe ta uno diferente unda cu awor ta habri 7 dia pa siman di 8or di mainta pa 8’or di anochi, cu ta duna te hasta e contratista e chens pa sigui shop te hasta despues di 6’or di anochi.

CONTRATIEMPO

Pa straño cu por zona, Ponson ta splica cu nan a haya hopi contratiempo ultimo simannan unda cu containernan no tabata yega na tempo, y misteriosamente tabata bay otro destinacion. Algo cu nunca nan no a experiencia den henter nan bida comercial. Asina mes nan a opta pa habri diahuebs anochi y e surtido caba ta amplio. Ta spera cu dentro di un siman y mas, lo tin surtido mas amplio pa ofrece na su clientela.