Gabinete nobo y ex ministernan ta contradeci otro riba traspaso

ORANJESTAD – Gabinete Wever Croes ta confrontando contratiemponan e prome siman di trabou. Asina e prome mandatario di Aruba Evelyn Wever Croes a informa pa medio di un comunicado. “Den e prome dianan di gobernacion, Conseho di Minister ta reuniendo tur dia pa atende cu e situacion caotico cu a worde laga atras pa nos” Wever Croes a bisa. Di otro banda varios minister cu a haci traspaso e siman aki y siman pasa, ta sigura publicamente cu e traspaso a bay ordena y den bon forma. Dos pa tres minister sigur a bay publico completo cu potret pa mustra con bon e traspaso a bay. Entre nan tin ministernan Richard Arends y Michelle Hooyboer Winklaar. Pero Wever Croes ta mustra cu ‘Traspaso di gobierno anterior pa e nobo a bay sumamente caotico cu a haci dificil pa cuminsa traha di inmediato’. Segun e prome mandatario, ‘ningun computer a wordo laga conecta riba e lesenaar nan cu si a keda den algun oficina. Ningun documento a wordo laga atras’. Arends den su comunicado a sigura cu a laga tur cos nechi, y e mandatarionan nobo tambe lo a confirma esaki.