Mike Eman: Ora cu comentarionan ta cla, rapport ta sali

ORANJESTAD – Tur hende tin cu warda por lo menos un siman mas prome cu por conoce e contenido di e rapport di e secretariado di College Financieel Toezicht riba nos presupuesto. “Ora cu e comentarionan ta cla, e rapport ta sali” tabata e unico palabranan cu prome minister Mike Eman a bisa NoticiaCla.com dialuna mainta, referiendo na e rapport aki. E no kier a bisa mucho mas cos, y a referi na declaracionnan haci recientemente riba e topico aki, y a bisa ‘esey ainda ta vigente’. Cu e poco palabranan, e mandatario a bisa hopi toch, indicando cu no ta papia riba e topico te ora cu e ta cla pa publicacion.

For di momento cu e comision a entrega e rapport na gobernador dia 12 di september ultimo y a bira conoci cu lo dura por lo menos 3 siman prome cu esaki bira publico, e interes pa pone man riba e rapport a crece. Specialmente considerando cu e rapport anterior, esun intermedio si a keda publica mesora despues. “E caso aki ta diferente, cu ta referi un proceso tambe diferente” un fuente a sigura NoticiaCla.com ora cu e rapport final a sali.

E contesta no tabata suficiente pa entre otro partido den oposicion, esta MEP cu a bay asina lew di manda un carta pa minister hulandes responsabel pa asuntonan di Reino, Ronald Plasterk, pidiendo e pa e publica e rapport of pidi gobierno di Aruba pa haci tal. Contesta di Plasterk na Mep tabata cu ta keda na gobierno di Aruba si ta publica e rapport of no.

Despues den fin di siman, e lider di partido MEP Evelyn Wever Croes a bay radio y anuncia cu e tin e copia di e rapport pero cu e no ta bay publica esaki, sino ta lague pa prome minister Mike Eman. Loke si Wever a haci, ta lesa loke e ta yama fragmento di e rapport, unda cu ta mustra cu segun Wever, con malo esaki ta. Contraste di loke a wordo bisa anteriormente vs e loke ta para den e rapport lo ta grandi segun Wever su declaracion na radio diasabra ultimo. Pues pa loke ta e rapport, dialuna mainta e mandatario en cuestion a indica caba cu e ta sali, ‘ora cu e ta cla’.