Oduber: Trabaonan di DOW awor por tuma lugar anochi tambe

ORANJESTAD – Pa evita inconveniencia comercial, trabaonan di construccion cu ta toca e areanan ey, por wordo haci anochi tambe awor. Asina minister nobo di infrastructura Otmar Oduber a informa diahuebs. Segun e mandatario, por mira den caya grandi por ehempel con trabaonan a perhudica tiendanan na cierto momento na un forma basta fuerte. Havenstraat tambe a sufri di esaki como un di e adernan principal pa loke ta trata comercio. Segun Oduber, un di e prome yamadanan cu el a haya, ta di comerciantenan den Havenstraat relaciona cu e trabaonan cu ta tumando lugar. Pa e motibo aki a combersa cu director di DOW pa den futuro mira con por haci cu mayoria di e trabaonan por tuma luga den oranan di anochi manera cu ta mira ta tuma luga den exterior, pa loke ta restauracion y construccion di caminda.

Anochi ta un ambiente mas mihor tambe pa e trahadornan y nos leynan laboral ta permiti esaki tuma luga tambe. Ta papia cu contratistanan y mustra nan e direccion cu nos kier bay cu e maneho nobo, pa evita e congestion cu tin na e momentonan aki di trafico na Aruba. “Berdad trabaonan ta tuma luga pa mehora e fluho y infrastructura, pero esaki at ocasiona hopi molester na nos comunidad. E condicion di e trabao tambe lo mester wordo haci den forma cu e trabou por wordo haci anochi. Esaki lo alivia trafico y stimula mas pasenshi cu mester tin riba caminda. Banda di esaki comercio tambe lo sinti e alivio aki.”