St Maarten a ricibi aanwijzing atrobe awe !

DEN HAAG – Riba conseho di secretario di estado Hulandes di asuntonan di Reino Raymond Knops, Conseho di minister di Reino a duna St Maarten otro ‘aanwijzing’, osea instruccion awe mainta. E instruccion ta contra prome minister William Marlin , cu e exigencia cu e prome mandatario keda retira y reemplaza. E instruccion ta bin pa Gobernador di e isla, y pa e actua conforme e instruccion aki. Asina informacion di gobierno a informa oficialmente.

MOCION

Segun e informacion ta recorda cu dia 2 di November ultimo, Parlamento a entrega un mocion di desconfianza contra e mandatario y 5 di su 6 ministernan. E gabinete a entrega su funcion y tabata demisionario pendiente e formacion y instalacion di un gabinete interino. Dia 10 di November Marlin a haya su di dos mocion di desconfianza contra dje. Sinembargo Marlin no a tuma e pasonan necesario pa retiro y pidi Gobernador pa actua. Cu esaki a viola e ley estatal basico cu un minister ta bandona cu no ta goza mas di confianza di parlamento. “Como cu e prome minister ta actua contra su huramentacion di mantene e constitucion di St Maarten, e ta viola e principio di democracia parlamentario y ta rechaza e deseo di Parlamento, e principio di bon gobernacion ta asina atacha, cu Gobierno di Reino mester actua pa proteha Reino Hulandes”. Cu e instruccion, Gobierno di Reino Hulandes ta manda un mensahe cla con serio e ta contra violacion di e regla di confianza. Ta sali di punto di bista cu Gobernador por eherce su poder cu ta conduci finalmente na retiro di Marlin y su gabinete awor si.