Romero: Despues di 8 aña DTZ ta haya bishita di minister atrobe

ORANJESTAD – Despues di 8 aña, Directie Telecomunicatie Zaken ta a haya bishita di un minister atrobe. Asina e mandatario ta informa den un comunicado. Segun e mandatario encarga cu telecomunicacion Chris Romero, tin inversionnan cu ta necesario pa modernisa DTZ, pa asina e por funciona mas efectivamente. Romero ta di opinion cu mester haci tur lo posibel pa haci e inversionnan rekeri den DTZ. E ta un departamento di un gran importancia awendia, como cu e mundo di telecomunicacion ta keda evoluciona y e departamento mester keda actualisa pa cu esaki.

“Telecomunicacion awendia no ta manera 10, 20 of 30 aña pasa. Awendia e ser humano ta depende den gran parti di telecomunicacion. Companianan di tur tipo y di tur servicio ta depende di telecomunicacion riba nan base diario. Telecomunicacion ta aporta grandemente na nos economia y como tal, e departamento di DTZ mester keda actualisa pa por brinda un mihor servicio na nos comunidad.”

Algo cu a cay como un sorpresa pa Romero, ta ora cu el a wordo comunica cu despues di 8 aña, esaki ta e prome biaha cu DTZ ta haya bishita di un mandatario. Minister Romero a compromete su mes di mantene un contacto regular cu DTZ pa asina keda na altura di e desaroyonan di e departamento.