Fundacion pa proteha Sero Crystal, cu ultimatum pa gobierno

ORANJESTAD – Departamentonan concerni di gobierno tin 14 dia pa actua riba e asunto di e area na Sero Crystal, sino e fundacion Conserva Area Cristal lo hiba nan corte. Asina e vocero di e fundacion, esta Hilde Rodriguez-Taekema a confirma pa NoticiaCla awe mainta. El a mustra cu e situacion actual eynan ta insoportable den varios forma. Trahamento den oranan di marduga cu zonido y luz fuerte, hendenan illegal trahando, y yen di otro cosnan cu no ta andando manera mester ta. Y e departamentonan di gobierno no ta reacciona den un forma cu mester. Como tal e fundacion a pone un ultimatum pa gobierno sino lo topa gobierno den corte pa resolve e asunto aki.

FUNDACION CONSERVA AREA CRISTAL

Tabata algun siman pasa cu e fundacion a nace, for di e pensamento cu ta solamente un fundacion integra por salvaguardia e interes di ciudadanonan y laga e voz di naturaleza razona. Segun e fundacion su vocero, tin compania (nan) cu ta kere cu nan a haya un carta ‘liber’ pa exploita e terenonan rond di e cero -cu ta apunta segun un ROP (Plan di Desaroyo di tereno) como tereno di naturaleza protehi- malusando esaki cu cobamento y otro actividadnan industrial pisa. Segun e fundacion, e companianan aki ta causando daño irreparable na naturaleza y ta causa e habitantenan den cercania cu un molester enorme cu ta peligroso pa salud. Nan lo no ta dispone di permisonan necesario segun e fundacion y ta eherce nan trabou pafo di e frontera marca como parcela.

CARTA

Casi tur departamento di gobierno di Aruba a haya un carta dia 4 di juli ultimo riba e situacion pero ta algun a medio reacciona. E tendencia general ta pa pasa e problema pa otro, y no actua corectamente. For di departamento di salud, esun di economia, DOW, Departamento huridico, DNM, y asina tin un cantidad di departamento cu no ta mira e importancia y tin un excusa pa tur cos riba e asunto aki. Mirando e situacion, e fundacion a dicidi awor pa manda un carta pa gobierno di Aruba cu e mensahe cu si dentro di 14 dia e departamentonan concerni no actua conforme nan trabou y haci e controlnan necesario, e fundacion ta hiba gobierno di Aruba dilanti mesa berde.