Croes: Detencion director Arutram relaciona e.o. cu falsificacion recibo

ORANJESTAD - E detencion dialuna di e director di Arutram, A. Geerman tin di haber cu 'iregularidadnan cu placa'. Asina director di Arubus Teo Croes a confirma pa NoticiaCla diaranson. Manera ta conoci diamars e noticia a bira conoci di e detencion di e persona aki, aunke no por bisa cuanto tempo e persona lo keda deteni. Mientras cu Croes no por a bisa mucho, el a confirma cu recherche y demas autoridad ta ocupa cu e investigacion. "No sa ainda di cuanto placa ta trata" Croes a bisa, y cu e investigacion tin cu determina esey. E departamento forensico ta haciendo su trabounan, pa saca afo kico mas por saca afo. Croes a confirma tambe cu e persona en cuestion a 'falsifica recibo y a cobra cu petty cash'.