Ladronnan di joyeria deteni pa polis

ORANJESTAD – Polis a gara y detene ladronnan di joyeria diadomingo atardi. Desde mainta caba polisnan tabata investiga un caso di destruccion y ladronicia den un joyeria. Usando coordinacion y strategia tactico a conduci na un investigacion cu a culmina den un persecucion y e captura di tres persona. Polisnan di districto di Noord a logra persigui y para un auto marca Toyota modelo Rav 4 cu no menos di tres persona aden den Dakota. Entre e chauffeur y dos pasahero tabatin tambe e sospechoso principal di inicial A.T. cu polis a logra detene mesora. Ta sospecha e trio aki, forma pa dos hende homber y un hende muhe, di lo ta envolvi den un serie di destruccion di vitrinanan y hortamento den joyeria.

Na dado momento polis a topa cu e auto sospechoso, a persigui y para e auto. Den e auto a logra haya parti di e botin, demostrando cu polisnan a logra gara e sospechosonan casi "op heter daad betrapt". Tur tres a keda deteni pendiente e investigacion andando, relaciona cu e caso di ladronicia den joyerianan. Polis no ta descarta cu lo tin mas detencion den e dianan nos dilanti. Despues di e detencion na e auto, a sigui pa un "huiszoeking" na un cas situa den Fijostraat. Ey a bay cu diferente otro departamento di Polis pa sigui cu e investigacion.