De Sousa: Kier hues dicidi riba su caso mas pronto cu ta posibel

ORANJESTAD - Ex parlamentario Desiree de Sousa-Croes lo pidi un hues dicidi riba su caso 'mas pronto posibel'. Den un reaccion breve pa NoticiaCla, e ex parlamentario a comenta cu manera indica caba, ela wordo nenga su ultimo posicion como ambtenaar, ora cu gobierno a cambia di signatura recientemente. "Nos lo protesta (bezwaar) y pidi hues dicidi riba esaki mas pronto cu ta posibel" de Sousa a sigui bisa e portal aki.  

E CASO

Informacion cu tin ta mustra cu ora cu gobierno a cambia di signatura, esnan cu den e caso aki p.e. tabata parlamentario pero no a bolbe den e parlamento nobo, y tabata ambtenaar, mester bolbe den nan funcion bieu. Segun de Sousa, su informacion cu e tin, ta bisa cu esaki ta director di Arubahuis. Esey tabata su funcion prome cu el a bira Parlamentario. Gobierno ta pensa otro, y ta referi na su trabou prome cu esey, cu ta docente. Como tal, el a ricibi un carta di gobierno cu ta mustr'e cu e tin cu bay eynan.  De Sousa sinembargo a biaha pa Hulanda pa ta bek na su funcion di ambtenaar, cu ta Arubahuis. 

E disputa aki awor, lo tin cu keda dicidi pa un hues, y de Sousa ta spera cu esaki keda regla pronto. Mientrastanto e ta na Hulanda.