Partidonan politico ta cuestiona otro riba agresividad di manifestacion

ORANJESTAD – Cu otro manifestacion tras di lomba y mas na caminda, e discusion politico riba e efecto, y mas importante, e seguridad rond di esaki ta e discusion di momento. Fraccion di partido AVP ta condena e agresion cu a tuma lugar na e manifestacion di diabierna ultimo y cu nan ta considera culpa di MEP, mientras MEp ta culpa e agresividad di e polisnan pa cu e control di esaki. Tur esten tin un otro protesta cu ta planea pa otro siman caba. Contrario na pensamento inicial, no ta partido MEP, sino un grupo cu ta yama su mes ‘Comision Accion Nacional’ tin e protesta planea pa dia 1 di october. E detayenan di e protesta no ta conoci, pero e motibo ta pa protesta e aumento di tarifa di awa y coriente. Algun integrantenan di e partido MEP a confirma na NoticiaCla.com cu contrario na informacionnan inicial, e permiso cu lo a wordo duna, ta pa e grupo aki pues, y no partido MEP. E protesta di partido MEP lo ta mas laat den luna di october, aunke cu no a haya un permiso ainda pa esaki. E grupo ta consisti di gremionan priva, publico, sindical, y demas organisacionnan cu a wordo invita pa bringa e aumento di tarifa cu nan ta yama ‘ inhusto y infunda’ fecha prome di october 2014.

Mientrastanto fraccion di partido AVP su pensamento ta cu e derecho pa expresa bo mes y si ta necesario protesta contra di algo of un organisacion, ta parti esencial di nos democracia. “Mester proteha e derecho fundamental aki semper. Uzo di agresion den protesta no ta aceptabel”, e fraccion ta laga sa pa medio di un comunicado. “Mester preveni repeticion di situacionnan asina na cualkier protesta di cualkier grupo of partido politico den futuro. Mester garantisa e seguridad di esnan cu ta participa na e protesta y esnan cu ta na e luga di protesta”, e comunicado ta sigui bisa. E partido berde ta culpa e partido geel, cu nan a haci e situacion pio “ E echo cu e protesta di diabierna pasa a wordo organisa door di MEP mes, ta haci loke a sosode pio. Netamente partidonan politico mester ta capaz pa garantisa e seguridad di tur hende y orden publico den nos pais. E desorden, agresion, ofensanan verbal y sirbi, den e protesta, ta mustra e nivel cu e partido MEP a yega na dje” e comunicado ta sigui bisa.

Partido MEP no a comunica publicamente riba e topico, pero si via rednan social. Di parti di partido MEP, mientras cu nan ta considera e accion di diabierna como exitoso, nan a condena e forma con polis a actua, usando riot comando, y tambe e uso di cachonan di polis. Nan ta sinti cu no tabatin necesidad di bin cu e plan aki y cu polis a abusa di su poder den intento di controla e orden publico. Nan ta considera cu loke a sosode no tabata e miho forma di controla un manifestacion.