Gobernador a clarifica su 'rol', durante huramentacion Gabinete Wever Croes

ORANJESTAD - Na ocasion di huramentacion di Aruba su gobierno nobo, -den e caso aki Gabinete Wever Croes-, Gobernador di Aruba, Su Excelencia Alfonso Boekhoudt a usa e momento aki pa den su discurso atende cierto asuntonan crucial na esnan presente. E ocasion mes tabata pa huramenta e 8 ministernan cu lo goberna pais Aruba pa e proximo 4 añanan, lidera pa Evelyn Wever Croes na cabez como e prome Prome minister femenino di Aruba. 

HIGHLIGHTS

Den Stadhuis, unda cu prome biaha un Gobernador a huramenta un gabinete na Aruba, Boekhoudt a accentua riba algun punto historico manera e hecho cu ta prome biaha cu ta huramenta un dama como prome minister pa Aruba, y cu despues di 16 aña Aruba tin un gobierno di coalicion di tres partido politico. Pero loke mas a hala atencion, ta su clarificacion riba su tarea como Gobernador, ya cu manera e mes a bisa, ultimo 10 luna di su nombracion, el a experencia 'hopi inconsistencia den expectativanan di kico ta rol di Gobernador'. 

NOTA DI FORMACION

Segun Gobernador, e hecho cu e ministernan ta para aki awe, ta dune e confiansa cu awe 'lo huramenta un Gabinete solido'. Mes momento el a mustra cu esey ta un du e puntonan cardinal stipula den su nota di formaicon pa yega na establece un gobierno nobo. E punto cardinal cu e ta haci referencia na dje ta e 'formacion di un gabinete solido cu lo conta cu sosten di un base amplio den parlamento, cu lo sirbi interes general di henter poblacion di Aruba".  A pone enfasis riba tres punto cardinal tambe. Entre nan, oportunidadnan pa Aruba, cooperacion entre partnernan den Reino, y un futuro stabiel y sostenibel.

ROL DI GOBERNADOR

Gobernador a haye oportuno pa na e ocasion aki, profundisa riba e relacion entre Gobernador y e ministernan, 'cu mester para cu otro riba un mesun liña'. Y mirando su relacion fastioso y confrontal cu el a haya su mes aden cu e gobierno saliente, el a dicidi di acentua riba e topico aki tambe. "Den e ultimo 10 lunanan (desde mi nombracion como Gobernador di Aruba) mi a experencia hopi inconsistencia den expectativanan di kico ta rol di Gobernador" Gobernador Boekhoudt a bisa. "Expectativanan cu no semper tabata basa riba nos constitucion y e posicion di e Gobernador". Den e discurso cu por lesa AKI, e ta elabora mas riba e tema aki. Na final, Gobernador Boekhoudt a presenta un contemplacion. "E diferencia entre exito y fracaso ta depende grandemente di haci loke ta corecto y na interes general, en bez di loke ta popular y na interes invididual". Y como punto final, el a desea e gabinete 'un deseo cu Dios lo benciona e periodo di Gobernacion". Lesa e discurso integralmente AKI.