Debate riba color di bandera di Aruba den parlamento

ORANJESTAD – Discusion riba e color blauw di e bandera di bandera di Aruba ta cuminsa e siman aki, ora cu e wordo trata den parlamento di Aruba diamars awor. Gobierno di Aruba a presenta e ley aki, pa sigura e color corecto wordo uza, mientras cu partido di oposicion a bisa caba cu nan lo bringa esaki. Argumento di gobierno di Aruba pa bin cu e ley ta cu pa hopi aña tabatin un discusion hopi grandi riba e color di nos bandera, pero tambe por a mira specialmente e ultimo añanan cu tin un sinfin di colornan diferente di nos bandera. Segun gobierno su argumento, por mira banderanan na edificionan gubernamental y hasta di Gobernador cu no ta e color di nos bandera. Algo cu sinembargo segun informacion cu NoticiaCla.com tin, no a wordo proba. Mientras cu gobierno ta admiti cu den tanto gobiernonan di signatura di AVP como MEP tabatin comision pa atende esaki, nunca e no a wordo regla y a keda mas bien pega.

E discusion pues di e bandera no ta riba e contenido completo di e bandera, sino e color blauw so. Y aki gobierno kier regla esaki pa medio di un ley. Partido di oposicion a mustra caba cu nan lo bringa esaki, segun un declaracion riba e pagina di Facebook di e lider di e partido, algun siman pasa. . Oposicion (partido MEP) ta sali for di punta di bista cu e lider di e partido e tempo ey, Betico Croes e.f.m., a splica e motibo. " Wanneer gekozen wordt voor de blauwe kleur van de Verenigde Naties, dan betekent deze kleur de simbolisering van alle 42 of meer geregistreerde nationaliteiten op het eiland Aruba". Tabata na anja 1976 cu gobierno di Aruba di e tempo ey, a scohe pa e color blauw UNITED NATIONS BLUE pa bandera di Aruba. Lider di MEP, tabata hopi cla riba su pagina di facebook siman pasa ora cu esaki a keda postula. “Ningun hende pensa di bin cambi'e!”

E precupacion cu Oduber, den calidad di minister di Cultura, tin ta cu e color cu e tempo ey a wordo scohi, ya no tabata existi mas y a wordo descontinua for di añanan 50. Como tal mester pone e color corecto den un ley, cu ta duna autoridad e poder pa actua ora cu importa bandera di Aruba, cu un color blauw diferente. E color cu ta bay wordo uza awor, ta esun ‘mas similar na nos e color original (di e bandera cu a wordo lanta den stadion na aña 1976). E tratamento di e ley aki ta cuminsa diamars mainta 10’or unda cu por spera sigur e debate entre e partido MEP y AVP riba e topico di bandera.