BCA: Ta mantene porcentahe actual di tasa di 'reserve requirement'

ORANJESTAD - Durante e reunion di dia 7 di september 2017 e Comite di Maneho Monetario (CMM) di Banco Central di Aruba (BCA) a dicidi pa mantene e percentage actual di e tasa di e “reserve requirement” na 11 porciento y e “advance rate” na 1 porciento, despues di a evalua e datonan economico y monetario mas recien. A considera e siguiente informacion y analisis den e proceso pa yega na e decision aki.

RESERVANAN INTERNACIONAL

E reservanan internacional di divisa (incluyendo diferencianan den revaluacion di oro y di reservanan internacional) y e reservanan oficial a mantene nivelnan adecua na fin di juli 2017. A pesar di e caida registra den e reservanan internacional durante e luna di juli 2017 compara cu e luna anterior, e reserva internacional di divisa a aumenta den ambos e reservanan internacional (+Afl. 5,9 miyon of +0,3 porciento) como den e reservanan oficial (+Afl. 24,9 miyon of +1,5 porciento), compara cu december 2016. Consecuentemente, e reservanan internacional y e reservanan oficial a yega, respectivamente, te na Afl. 1.898,3 miyon y Afl. 1.698,1 miyon na fin di juli 2017. 

DESAROYONAN DEN CREDITO

E crecemento di credito total di e banconan comercial a keda positivo (+3,7 porciento) na final di juli 2017 compara cu december 2016. No obstante e caidanan registra den credito na consumidor (−1,6 porciento) y den credito na empresa (−1,4 porciento), credito bancario a keda positivo, debi na expancionnan den fiansa pa construccion di cas (+2,6 porciento) y un compra neto di Afl. 108 miyon di bononan di gobierno door di e banconan comercial. 

INFLACION

Na juli 2017 a registra un caida fuerte den e prijsnan compara cu e aña anterior (−1,1 porciento) como tambe den e promedio anual di inflacion (−0,4 porciento), manera midi den e Indice di Prijs di Consumo (CPI). Ambos bahada ta principalmente causa pa un reduccion den e tarifa di coriente (−14,0 percent) na januari 2017. E promedio di inflacion ora exclui e componentenan di cuminda y energia a yega na 0,4 porciento, primordialmente reflehando un aumento den e componentenan di vivienda y hotel & restaurant di e CPI na Juli 2017.

TURISMO

Durante e prome shete lunanan di 2017, e debilidad den e mercado di turismo for di Venezuela a sigui manifesta den caidanan den e cantidad di bishitantenan total (−7,0 porciento) y anochinan permaneci na Aruba (−2,1 porciento). Di otro banda, a registra un expansion den e cantidad di turistanan crucero (+18,1 porciento), mientras cu e mercado Mericano a presta faborabelmente, loke ta refleha pa un impulso den e ingresonan turistico registra na banconan comercial (+5,9 porciento).

PLACA DEN CIRCULACION

Na juli 2017 e cantidad di placa den circulacion a aumenta cu Afl. 60,3 miyon te na Afl. 4.194,5 miyon, compara cu e luna anterior. E subida aki ta debi na expansion den e activo domestico neto (+Afl. 81,5 miyon), parcialmente mitiga pa un caida den e reserva di divisa neto (−Afl. 21,1 miyon). Mientras cu e aumento den e activo domestico di placa den circulacion ta atribui na un expansion den credito domestico (+Afl. 85,3 miyon) y un caida leve den transaccionnan no relata na credito (−Afl. 3,8 miyon), e bahada den e reserva di divisa neto a resulta principalmente door di transaccionnan relaciona cu pagonan pa importacion di mercancia, otro servicionan y transferencianan pa cuentanan den exterior. Esaki a wordo primordialmente mitiga pa entrada for di actividadnan di turismo.

MERCADO FINANCIERO

Na juli 2017, a nota subidanan den e averahe di interes riba prestamonan nobo (+1,7 punto di porcentahe te na 7,3 porciento) y den e averahe di interes riba depositonan nobo (+0,1 punto di porcentahe te na 1,9 porciento), compara cu e luna anterior. Consecuentemente, e averahe den e margen di e tasa di interes a aumenta cu 1,6 punto di porcentahe te na 5,5 porciento. 

ADVANCE RATE

E determinantenan di e “advance rate” di BCA a keda stabil. E margen entre e “advance rate” di BCA y e “Federal Funds rate” tabata 0,15 punto di porcentahe na juli 2017. Consecuentemente, no tabata tin razon pa cambia e “advance rate” di BCA.