Diploma HAVO/VWO na Aruba sin balor pa Hulanda aki 2 aña

ORANJESTAD — Un total di entre 1600 pa 1800 studiante di Aruba por confronta problemanan serio aki un par di aña ora cu nan termina nan enseñansa avansa (havo/vwo) na Aruba. Esaki pasobra nan diploma ( di esnan cu caba havo /vwo na Colegio Arubano)lo no tin balor pa por continua estudio na Hulanda, manera cu e situacion ta aworaki. Cartanan di Hunta di supervision di SMOA (Stichting Middelbaar Onderwijs Aruba) cu ta maneha Colegio Arubano y cu NoticiaCla.com a pone su man ariba den fin di siman, ta mustra cu nan ta hopi precupa cu si no actua awor, e problema lo bira uno real, cu tur su consecuencianan.

E ta trata di un protocol cu e minister di enseñansa di e tempo ey (Arthur Dowers) a firma na 2012 cu Hulanda pa e exigencianan di examen final pa Havo y VWO cu por bira un problema. Segun e protocol firma, Aruba ta tuma e reglanan hulandes over, cu ta rekeri hopi adaptacion. Pero e precupacion di SMOA ta cu dos aña despues cu a firma esaki, nada no a sosode. Como tal e ta pone un grupo grandi di studiante den risico cu ora cu nan caba scol secundario na Aruba, nan no por drenta un universidad na Hulanda.

Mientras cu otro partinan den Reino Hulandes tambe a firma tipo di acuerdo similar, e efectonan pa Aruba ta mas grandi pasobra segun e carta di SMOA e tempo ey a scohe pa un otro tipo di contenido di havo,vwo. Consecuentemente institutonan educacional hulandes ta mira e diplomanan di Aruba semper mas critico.

Informacion cu NoticiaCla.com a ricibi di su fuentenan den fin di siman, ta mustra cu e protocol di acuerdo cu e informacion ricibi, lo no a wordo publica pa gobierno di Aruba. Ta danki na e ministerio di enseñansa di Hulanda y ex rector hulandes Hans van Tuijl, cu e rapport a yega den publicidad. Mientras cu aña pasa Colegio Arubano a organisa un dia di estudio unda cu a presenta ideanan pa un adaptacion di un tabel di les y pakete, nada mas no a sosode y no tin un bista (por lo menos publicamente) di e cambionan necesario.

Den e carta, SMOA ta culpa minister di enseñansa actual Michelle Hooyboer-Winklaar di no a actua den e caso aki. Ademas SMOA lo no a wordo informa suficientemente di e progreso (si tabatin uno). E carta ta mustra tambe riba e atencion cu SMOA a pidi e gabinete Mike Eman II durante su periodo di formacion, ya cu e adaptacionnan lo mester a wordo aplica caba. Segun e protocol, esnan den klas 4 di tanto Havo como VWO ya ta perhudica. Ora cu nan haya nan diploma aki dos aña, e lo ta un diploma cu no ta cumpli cu exigencia hulandes. E carta di SMOA ta mustra tambe cu e mandatario no ta splica si Hulanda ta dispuesto pa extende un periodo di retraso. SMOA a manda e carta aki tambe pa ministerio di Hulanda pa wak si por haya informacion di e banda ey.

Entre e cambionan segun e protocol , tin cu e evaluacion pa graduacion ta mas estricto. Entre nan, cu por tin solamente un (1) ‘onvoldoende, ora cu ta trata di e cursonan principal. Algo cu aworaki no por ya cu studiantenan por compensa nan puntonan malo cu cifranan di otro curso cu no ta den e pakete. Y e problema ta cu e scol mes no por implementa e cambionan, pero cu esaki mester sosode di nivel di gobierno, cu tin cu cambia ley riba riba un nivel central.