Huez-comisario ta alarga y suspende detencion di Croes

ORANJESTAD - Huez-comisario den e casonan penal na Corte di Prome Instancia di Aruba a dicidi awe pa alarga detencion preventivo di e sospechosonan P.T.F. Croes y R.A. den e caso Ibis cu 30 dia. Riba peticion di Ministerio Publico, huez-comisario a suspende detencion di e sospechoso R.A. Ademas huez-comisario a dicidi pa suspende detencion di Croes riba peticion di su defensa. Croes ta sospecha di a haci su mes culpabel di echonan castigabel hopi grave: 'ambtelijke omkoping' (pasivo), malversacion, labamento di placa, falsificacion y 'mensensmokkel'. E schorsingnan ta bou di condicion estricto. Ambos sospechoso no mag di tin contacto directo, ni indirecto cu e testigonan y cu e otro sospechosonan den e investigacion Ibis. Ministerio Publico ta mustra enfaticamente cu e decisionnan di huez-comisario ta solamenta pa trata e detencion di e sospechoso y no e caso penal riba su mes. Huez-comisario a confirma awe atrobe cu ta existi e acusacionnan serio contra Croes y A. E investigacion Ibis lo continua y Croes ta sigui como sospechoso. E plan ta pa finalisa e dossier na maart 2018, despues di cual lo por tin e 'regiezitting' na april 2018.