Bloomberg: Segun S&P, Venezuela ta den 'default' pa pago di debe

NEW YORK/CARACAS – E reunion dialuna di e creditornan Venezolano a dura apenas 30 minuut y no a logra nada concreto. Asina e portal financiero Bloomberg ta raporta. Segun e portal, pa haci cos mas pio, e agencia di rating S&P Global Ratings a declara e pais ta den ‘default’, pues cu nan no a cumpli cu nan obligacionnan financiero. Fitch Ratings a cita cu e compania estatal PDVSA a faya cu su pagonan. E reunion a tuma lugar na Caracas, unda cu menos di 100 creditor a aparece na e reunion na e capital.

A anuncia masha poco y nada no a keda resolvi, segun esnan cu a atende e reunion. Nan a bandona e reunion mas confuso, cu ora cu nan a yega. E vice presidente di e pais, Tareck El Aissami, tabata e unico pa papia y a sigura cu e pais lo cumpli cabalmente cu su obligacionnan y traha cu e accionistanan pa busca otro forma pa nan yega na nan placa, aunke no a ofrece nada concreto.