DOW: A logra salba Bubali Plas, e efecto di diesel ta minimo

ORANJESTAD - Despues di 2 dia y mey di esfuerso nonstop di staff di DOW, e trahadornan y su contratistanan a logra contene e diesel procedente di e incidente na Hospital, pa e no causa un desaster na habitad di Bubali Plas. Asina DOW ta informa den un comunicado. Mester bisa si cu esaki a rekeri hopi esfuerso di staff di maneho di DOW y cu apoyo di comision di calamidad.

E comision tabata monitor e situacion continuamente y tabata informa gobierno y demas stakeholders di e situacion. A tuma decision clave y cu hopi cautela y presicion a tuma e pasonan necesario pa logra e meta pa e diesel no yega den Bubali Plas. Diadomingo merdia despues di e analisis cu Directie Natuur & Milieu a haci tanto den Bubali Plas como den e planta di tratamento di awa residual, a conclui cu e nivel di oxigeno den e awa di Bubali Plas y tambe den e planta ta bon atrobe. Esey kiermeen cu por a bay over pa trece awa cu bacteria activo for di planta di Parkietenbos pa jumpstart e proceso den e AeratieTank. Ora cu e proceso aki ta bou di control, lo bolbe cuminsa manda awa pa bubali Plas.

Gerencia di DOW ta gradici tur e instancianan cu a traha cu alma y curpa, overtime y bou di e condicionnan tenso pa realisa e trabou grandi aki, cual a evita un desaster na e sanctuario di parha y pisca di Bubali Plas. Un biaha mas DOW ta gradici tur esnan cu a yuda y ta segura cu lo sigui monitor e proceso den e proximo simannan.