Mitch Henriquez a grita cu e tin arma, segun polis den corte

DEN HAAG/SCHIPHOL   Prome cu su detencion, Mitch Henriquez tabata bisa cu e ‘tin un arma di caliber 52’, y tambe el a haci ‘movecion di ganster’ y a tene su parti intimo varios biaha. Asina agentenan policial cu ta sospechoso den caso di morto di Henriquez, a testigua dialuna mainta den corte na Schiphol. Henriquez a wordo atendi pa e polisnan y bisa pa bay di e lugar. El a bay di eynan, compaña pa un muher, pero a los y a bay bek pa e polisnan pa bolbe bisa cu e tin un arma. E prome biaha e tabata hari, pero despues no mas. “E tabata asina menasante cu mi a echt kere cu e tabatin un arma”, un di e polisnan den e caso a testigua den corte. Henriquez a wordo deteni pa 5 agente y a fayece un dia despues di su detencion. Dos di e polisnan ta sospechoso relaciona cu e morto. Nan a wordo identifica como polis DH01 y DH02. Hasta nan voz a wordo cambia. Abogado pa e famia a purba pa haya nan identidad bira publico pero no a logra. Huez ta dicta sentencia dia 20 di November. Fuente Telegraaf