Gobierno y Sands prohibi pa cambia destinacion di tereno of otorgamento di tal

ORANJESTAD – Tanto gobierno di Aruba como e desaroyadornan di proyecto Sands a haya un prohibicion di hues pa efectua cambio na destinacion di e acta di tereno erfpacht, te ora cu corte trata e caso sumario cu e representantenan di e proyecto Oceania a entama. Si gobierno of Sands viola e sentencia aki, nan lo haya un multa di 25 mil florin pa dia of parti di dia, te na un maximo di 2.5 miyon florin. Mes momento e abogado di Oceania a manda un carta pa tur oficina di notario cu e peticion pa no otorga ningun tereno durante e periodo prome cu e caso sumario tuma lugar. E prohibicion ta conta pa un total di 8 tereno cu lo ta cla pa sea wordo otorga como erfpacht, y of di cual e destinacion por wordo cambia pa adapta e proyecto existente di Sands.

MIEDO

Loke cu Oceania tin miedo, ta basa riba e forma di actua di e.o. gobierno den pasado, cu nan lo sa di ‘basila’ y via sea ‘buraco den ley’ of otro forma, efectua cambionan prome cu e caso sumario, perhudicando e compania demandante toch. Ta haci mencion di varios caso manera caso di Preserva Malmok contra Ocean Z, unda cu e ultimo aki a haya su gana prome cu e contra partido por a actua.  E caso sumario ta tuma lugar dia 24 di november 2017 pa 8’or y mei di mainta. Oceania a alerta tur partido pa no actua di awor pa e fecha, sino nan por haya nan mes mal sirbi cu un multa. Lesa e sentencia AKI.