Ha’Bon Aruba y Fundacion Pa Nos Comunidad ta forma un alianza

ORANJESTAD - Diahuebs 9 di November e compania Ha’Bon Aruba a tene un conferencia di prensa hunto cu Fundacion pa nos Comunidad. Durante e conferencia di prensa e compania Ha’Bon Aruba a forma un alianza hunto cu Fundacion pa nos Comunidad pa por yuda famia nan den necesidad na Aruba cu producto higienico, entre otro habon nan cu ta wordo produci aki na Aruba.

Ha’Bon Aruba su productonan ta completamente local, y ta wordo produci cu ingredientenan natural, dunando asina e cuido y atencion necesario pa nos salud y medio ambiente. Actualmente Fundacion pa nos comunidad ta yuda 95 pa 100 famia pa luna. Sra. Nelkis di Fundacion pa nos Comunidad ta conta cu ta hopi dificil pa hanja companianan cu por duna producto higienico como donacion y ta hopi entusiasma cu e iniciativa aki.

Ha’Bon Aruba hunto cu fundacion Man na obra y Trampolin ta super orguyoso di por traha hunto y entrega e habon nan aki tur luna na Fundacion pa nos comunidad. E miembro nan di Man na Obra y cliente nan di Trampolin pa Trabou ta hasi trabou voluntario na Ha’Bon pa asina nan tambe por contribui na e donacion aki. E idea di Ha’Bon Aruba ta cu e restante di e material di e habon nan, ta wordo reprocesa di nobo y esaki ta wordo duna bek como donacion. Algo di remarca ta cu riba cada un di e habon nan di e donacion di Ha’Bon Aruba ta ilustra varios man den un forma circular huntu cu un curason grandi den e centro. E arte aki a wordo pinta door di e artista Jocelyn Kelly. Jocelyn ta un hoben autista di 15 aña cu ta bishitando e scol Duna un Man. Su pasion ta Arte. E imagen di e man nan y curason riba e habon nan ta un simbolo di “duna un man cu curason y ricibi cu curason” ta Jocelyn su palabranan.

Ha’Bon Aruba a hasi entrega di un suma sustancial y lo keda hasi esey mientras Ha’Bon tin pa produci. Ha’Bon ta haya sumamente importante pa por yuda otro. “Un man ta pa yuda nos mes, e otro ta pa yuda nos projimo” ta palabranan di Naline Heilbron “ Mientras Ha’Bon tin e recurso nan necesario pa yuda pueblo sin duda Ha’Bon lo sigui contribui”.

Di e manera aki Habon Aruba kier a invita henter pueblo pa tambe bin cu iniciativa pa yuda famia nan den necesidad.