OM: No tin detencion ainda den caso di asesinato di Sarahi Sierra

ORANJESTAD – Diasabra awor famia y e conocirnan ta hiba e dama hoben Sarahi Sierra pa su ultimo lugar di sosiego. Mientrastanto e informacionnan cu NoticiaCla a logra acumula awe for di Ministerio Publico, ta trece algun claridad, aunke no hopi. Mientras cu a interoga basta hende, incluyendo famia y bisiña, no tin ningun hende deteni relaciona cu e caso. E investigacion conduci pa e patologo di Corsou siman pasa diadomingo, a produci material cu a manda Hulanda pa Nederlands Forensic Institute (NFI). “Esaki ta bay tuma tempo. Nos ta warda NFI pa duna nos e resultadonan” vocero di ministerio publico Ann Angela a bisa NoticiaCla.

DETAYE

Mas informacion cu por a comparti ta referi na e autopsia haci siman pasa. Manera ta conoci den caso di un morto cu no sa e causa, ta confisca e curpa pa haci e autopsia necesario. For di e autopsia, OM a confirma pa e portal aki cu Sarahi Sierra a muri ‘door di un crimen’. “ Investigacion tin cu mustra si ta asesinato of homicidio” Angela a sigui bisa. Pa loke ta e actonan cronologico di dia, Angela por confirma cu a mira Sarahi ultimo biaha pa mas of menos 7’or y mey di e diabierna mainta, ora el a hiba su yiu crèche. “Pero e orario di fayecimento nos no ta bay revela pa awor” Angela a sigui bisa. E ora cu a haya e curpa, ta conoci publicamente caba cu ta 1:35pm.

E TESTIGONAN

Polis na e momento aki ta ocupa pa canalisa tur tips y e declaracionnan di e testigonan. “ Bou e testigonan ta cay famia, amistad, bisiñanan, otro testigo, otro cu posibelmente a wak algo of scucha algo, plus hende cu ta acercando polis riba nan mes. Tips ta drentando!” Angela a sigura e portal aki. Mientras cu riba caya ta papia cu esun of esunan cu a comete e acto horendo aki, lo a viola Sarahi tambe Angela no kier a confirma. “Esey investigacion forensico lo tin cu mustra. Bo no por wak na un morto si el a wordo viola of no. Por tin indicacion, esey si, pero investigacion lo tin cu mustra. Diadomingo e autopsia a tuma lugar y a manda e resultadonan di e investigacion pa NFI. Esaki ta bay tuma tempo. Nos ta warda NFI pa duna nos e resultadonan” Angela a finalisa bisando.

ENTIERO

E entiero mientrastanto ta stipula pa diasabra awor entre 2 or pa 4 or na misa Santa Teresita na San Nicolas. Prome cu esey, lo tin posibilidad pa condoleer diabierna awor entre 7-9 di anochi na cas funeral Ad Padres na San Nicolas.