DOW: Derame di diesel di hospital lo a drenta Bubali Plas

EAGLE – E leak di diesel descubri awe mainta na hospital posiblemente a afecta Bubali Plas tambe. Segun director di hospital Ezzard Cillie a bisa NoticiaCla diabierna durante conferencia di prensa cu Departamento di Obras Publicas (DOW) a informa hospital cu tin un cos cu nan no por saca afo ainda , pero cu nan a topa cu lekkage di afvoer di hospital (na Bubali Plas), cu tin di haber cu e leak cu hospital a conoce awe. “Mi no ta bay mas leu cu esey, pasobra mi no ta competente of autorisa pa haci esey” Cillie a bisa NoticiaCla. Segun comentario di presidente di Aruba Bird Life Conservation (ABC) Greg Peterson, ta investigando e mancha ainda.

FOTO

Fotonan obteni pa NoticiaCla, saca awe tardi pa cortesia di ABC, ta mustra un mancha basta grandi di zeta cu ta di e derame di awe mainta. E area ta considera como un IBA, esta un ‘Important Bird Area’ (area importante pa pahra), y ta un di e 16 areanan cu mester ta protehi y bira parti di Parke Nacional Arikok. Un mocion den Parlamento aproba unanimamente aña pasa mester traduci den un ley ainda cu ta brinda proteccion pa e 16 areanan di cual Bubali Plas tambe ta forma parti di dje.