Situacion na hospital normalisando despues di derame diesel

ORANJESTAD – E situacion na Hospital ta normalisando despues di e derame di diesel cu a keda descubri awe mainta. Asina director di hospital Ezzard Cillie a informa den un conferencia di prensa diabierna merdia. Pa anochi, Cillie ta kere cu tur hospital lo ta operando normal atrobe. Mientrastanto e causa di e derame no ta conoci ainda y ta spera cu un ekipo di afo dentro di poco bin Aruba pa investiga e causa di esaki segun e director. Ta papia di por lo menos 10 mil liter di fuel cu a derama y sali afo.

E CASO

E unico informacion cu Cillie por a duna awe merdia, ta cu ‘tabatin un ekipo cu tabata traha cu fuel, y e fuel ey a lek di dje y bay den un espacio dedica pa esey so, y el a flow over di tal forma cu e la causa spilling tur caminda rond di e lugar” Cillie a bisa. Ademas e leak a causa ‘gas’ cu ta sali for di dje, y un holor insoportable pa e ser humano.

MIDI

E expertonan di varios parti a midi tur caminda pa check si ta ‘safe’ pa por laga hende drenta, y a pone coriente bek den e edificio den careda di 1’or di merdia. Instancianan cu a haci nan midi a oficialmente declara e edificio safe y cu e permiso pa start machine pa genera coriente.

PASHENT

Ta pasando tur pashent bek pa nan lugar original despues cu nan a evacua nan mainta. Algun di nan ta cana cu masker ainda pa motibo di e holor iritante, pero no cu e ta peliger pa nan salud.

RIESGO GRANDI

E humedad cu tabata sali di e likido cu a derama awe mainta, ta algo cu ta kima, of por kima. “Si e haya un chispa chikito, nos lo a haya un explosion akinan cu tur e resultadonan fatal di dje. Cu esey nos tabata bringa” Cillie a bisa. Riesgonan cu a wordo elimina mientrastanto pa departamentonan competente. SOGA

E top di e proyecto di expansion y renobacion di hospital di cual e parti afecta tabata esta SOGA (Stichting Ontroerend Goed Aruba), a priminti director Cillie cu lo tin un investigacion rigoroso di un grupo externo cu lo wak kico a pasa y a trigger loke a sosode.