Aruba tambe ta wordo menciona den e caso di Paradise Papers

ORANJESTAD – Aruba ta menciona den e documentonan internacional conoci como Paradise Papers, comparal cu esun di Panama Papers di algun aña pasa. Gobierno di Aruba mientrastanto (minister demisionario di Economia Richard Arends) ta sigura NoticiaCla cu e no ta na altura di e caso aki y ni con Aruba ta parti di dje. Contrario na Panama Papers, no ta conoci ainda cua compania of instancia of persona ta involucra den e caso aki. For di algun persona local a compronde cu mientras cu e storia ta ‘interesante’ pa menciona y ta causa sensasion, ‘mayoria compania na mundo tin e structuranan (di impuesto) aki. Structuranan complica di impuesto cu companianan manera Apple, Shell y hasta Reina di Inglatera a uza. Aparentemente hende ta gusta e tipo di storianan aki pasobra nan ta spera pa haya e ‘smoking gun’.

PARADISE PAPERS

Mescos cu e caso di Panama Papers, un grupo grandi di periodista internacional a descubri y publica documentonan ‘secreto’ cu ta divulga nomber di hopi compania y persona nan accionnan di impuesto. Esaki no necesariamente ta significa cu nan a haci algo ilegal, pero ta mustra cu nan a purba di probecha di facilidadnan legal pa paga menos impuesto. E biaha aki ta trata di dos compania di offshore basa na Bermuda, di cual un di nan yama Appleby. Ta trata di 13.4 miyon documento cu a keda publica e siman aki mundialmente.

ARUBA

Fuera di Aruba, paisnan manera Barbados,  Antigua and Barbuda, Bahamas, Bermuda, the Cayman Islands, Dominica, Grenada, St Kitts and Nevis, St Lucia, St Vincent and the Grenadines, y Trinidad and Tobago ta wordo menciona. Pa loke ta gobernantenan local, minister demisionario Richard Arends a informa e portal aki cu e no ta na altura di e caso y con Aruba ta involucra'.