Wever: Ministerio di integridad ta bira un hecho pa gobierno nobo

ORANJESTAD – Un ministerio nobo cu e gobierno nobo lo conoce ta un ministerio di integridad, y ta cay bou di minister di Asuntonan General. Esey a keda confirma pa formador y futuro prome minister Evelyn Wever na prensa diaranson merdia. E ministerio ta cuminsa prepara e incorpracion di un asina yama ‘camber di integridad’. E decision ta uno local y no riba insistencia y/of orden di Hulanda. Esaki pasobra pa Corsou y St Maarten p.e. si Hulanda ta exigiendo algo asina, cu por cierto ta un batata cayente pa e islanan en cuestion. E camber di integridad ta haya un formacion estilo CAFt, y lo bira e organo cu ta scrutina proyectonan prome cu nan pasa conseho di minister. E ta bira un grupo di persona independiente cu tin cu analisa y scrutina e detayenan pa evita cu cosnan por bay robes.

INTEGRIDAD

E intencion ta pa tur hende ta riba e mesun liña ora cu papia di integridad. E conscientisacion lo wordo treci, y tambe control top down, esta di ministernan bin abou. E ta forsa tur minister tene nan mes integro. Asina ta inculca e palabra di integridad den gobierno. Mientras cu Wever a sigura cu e decision pa bin cu camber di integridad ta un idea di Aruba mes, no tin mucho ‘choice’ pasobra ‘si nos no bin cu ne, Hulanda ta bin cu ne pa nos” Wever a sigui bisa, manera cu a sosode cu CAFt.