ASOCOL a cuminsa proyecto pa restaura Plaza El Condor

ORANJESTAD – Recientemente e Asociación Amigos de Colombia, mihor conoci como ASOCOL, a cuminsa cu nan proyecto pa asina restaura y embeyece nan Plaza situa dilanti di Price Smart, Plaza El Condor. E plaza ta un simbolo pa e comunidad Colombiano y ta wordo uza anualmente pa eventonan, especialmente rond di e tempo di pasco. E Directiva nobo di ASOCOL cu tin Moises Fernandez como presidente, ta pone hopi emfasis riba e plaza, como e ta e un lugar unda tur Colombiano y latino por uni como un comunidad Latino na Aruba y traha riba desaroya y pusha pa dilanti e comunidad na Aruba.

E proyecto aki ta uno cu a mira varios voluntario, personanan y companiana igual, participa pa asina por completa e prome fase di e proyecto. Incluso nos a haña un tremendo ayudo di e Honorabel Consul di Colombia, Sra. Gnecco Pla, cu a presenta durante e limpiesa pa duna un man. Locual ta sigui awor ta e mantenson y embeyecimiento di e tereno, pa asina por tin'e limpi na tur momento, y tin'e disponibel pa diferente evento cultural y familiar cu ASOCOL kier organisa den futuro cercano. E directiva actual lo percura pa mantene e plaza limpi y organisa eventonan familiar/cultural, pa asina e comunidad por ta orguyoso di nan plaza. Actualmente tin un acuerdo cu un compania cu lo mantene e plaza como un sponsorship pa e asociacion, cu lo zorg pa e Plaza semper ta netji y limpi.