DOW lo drecha e parti kibra y daña den Havenstraat entrante mayan

ORANJESTAD – Despues di basta critica cu Havenstraat parcialmente ta den mal estado cu e.o klinker kibra, Departamento di Obra Publico a informa diaranson cu automobilistanan cu ta haci uzo di e caminda di Havenstraat, cu entrante 9 di november 2017 pa 9’or di mainta te cu 20 di november 2017 lo bay cera e caminda completamente.

E motibo pues ta cu lo bay drecha e caminda menciona. Ora cu a puntra DOW kico exactamente ta bay haci, a confirma cu ta drecha full e partinan malo, incluyendo e klinkernan. E ceramento lo ta for di e crusada di Zara te final di Royal Plaza y e desviacionnan lo keda indica cu baricadanan y borchinan di aviso.

En conexion cu e trabounan menciona DOW ta haci un peticion na tur automobilista pa tene cuenta cu e cambionan den trafico y ta pidi pa tene cuenta cu e inconveniencianan cu lo por surgi pa cual nan ta pidi comprension.