Competencia na Scolnan Promotor di Lesamento

ORANJESTAD - Proyecto Promocion di Lesamento di Departamento di Enseñansa Aruba (DEA) pronto lo lansa un parti riba e website Enseñansa Aruba | www.ea.aw, caminda lo publica informacion pa maestro, mayor y tur cu ta interesa den e topico di lesamento. E enfoke ta riba placer den lesamento. Pa ilustra e texto riba e website a pidi e dos scolnan promotor di lesamento, esta Pius X School y Rosario College, pa tene un competencia di pintamento tocante lesamento en general. Lo haci uzo di e pinturanan di e muchanan riba e website. E pinturanan cu a gana ta haya un luga special sigur. Recientemente e lider di proyecto, Señora Angelique Maduro, a entrega e premionan na e muchanan cu a gana. Tur a ricibi un buki cu UNOCA a sponsor. Tambe por a regala e ganadonan un “gift certificate” danki na un donacion di HBN Law. E muchanan a keda masha contento!

Departamento di Enseñansa ta gradici e coordinadornan di lesamento, tur e maestronan di e scolnan promotor, e sponsornan y naturalmente e muchanan pa haci e actividad aki posibel. E website sigur lo keda masha atractivo. Pa mas informacion por acudi na nos website Enseñansa Aruba | www.ea.aw y/of sigui nos riba facebook.com/educationaruba pa keda na altura di e ultimo informacion.