Schwengle: Inspectie investigando caso di morto di Wouter deRuiter

ORANJESTAD – E caso di morto di e ciudadano conoci Wouter Louis-Rufino DeRuiter dialuna anochi, dado momento a haya atencion y a bira topico diamars atardi den Parlamento. Esaki ora cu algun parlamentario a uza e caso aki, pa ilustra y mustra nan punto di e cosnan cu ta bayendo malo den hospital. Y cu si kier un hospital nobo, mester drecha e fayonan, cu e.o. lo a conduci na morto di de Ruiter, prome cu sigui. Minister di salud Alex Schwengle a lamenta cu algun parlamentario a opta pa haci politica cu e caso, siendo cu nan no tin tur informacion. Segun e mandatario, e ta lamenta e caso y cu e caso ta den man di inspector cu ta investigando kico a bay malo, cu a conduci na morto di e persona en cuestion. Segun Schwengle, no tin tur informacion, pues no por bisa nada riba e caso ainda y tin cu warda e investigacion determina kico a sosode exactamente.

E CASO

E informacion cu tin ta, cu e persona tabata sinti su mes malo varios dia y na varios ocasion a mand'e cas cu paracetamol, sin cu por a saca afor kico exactamente tabata malo cu ne. Dado momento e dolor di e persona tabata asina intenso, cu el a bolbe hospital diadomingo, keda interna, unda cu despues di un control, a detecta un tumor den su cabes. El a drenta un coma e siguiente dia y lamentablemente a fayece e mesun anochi. E persona ta uno basta conoci den mundo comercial y politico y como tal a crea un ola di critica riba e rednan social riba e trato cu e persona aki a ricibi. Ta papia di negligencia di hospital, aunke cu investigacion tin cu determina kico exactamente a sosode y unda e fayonan a tuma lugar, si esey tabata e caso. NoticiaCla mientrastanto ta manda palabra di forsa na e famianan di Wouter DeRuiter.