Minister: Mayoria keho y critica riba proyecto hospital, infunda of incorecto

ORANJESTAD – Sea e mandatario no tabata presente e tempo ey, of cierto acusacion no tin base y of no ta cuadra. Esey tabata e reaccion gran parti riba mayoria di pregunta y acusacion contra e mandatario di salud Alex Schwengle riba e proyecto di expansion di hospital diamars den dia. E base di e interogacion tabata e suma di 80 miyon, cu a bin ‘extra’ di e proyecto di hospital, unda cu posibelmente e cosnan a bay malo y/of ilegal. Como tal e partidonan di coalicion a yama e mandatario ‘op het matje’ pa cuestiona e asunto.

MINISTER

Despues cu e parlamentarionan a uza e mainta pa haci pregunta, despues di merdia a toca turno pa e mandatario contesta e preguntanan. Pero a nota mesora cu mayoria, si no ta tur acusacion, a keda contra aresta pa e mandatario. Algun te hasta el a mustra cu tabata prome cu su tempo y cu no tabata su responsabilidad. Otro acusacion el a refuta, mientras cu algun el a acepta cu no tabata corecto, pero cu ora cu algo no tabata corecto, el a sa di informa esey tambe mesora. E acusacionnan di fraude, fixbidding y otro cos cu lo a bay robes, tur a keda rechasa pa e mandatario demisionario.

OPOSICION/COALICION

Tabata notabel cu di parti di partido di oposicion, tur cos cu ta regarda e hospital, tabata positivo, mientras cu pa esnan den coalicion, mayoria, si no ta tur, tabata sea malo of incorecto.

NEGLICENCIA

Algo cu ta logico tambe, mirando cu ta coalicion a pidi e reunion aki pa por a cuestiona e mandatario en cuestion riba e tema, e parlamentarionan a uza e momento pa critica hospital y e mandatario riba e caso lamentabel di morto di un hoben adulto, debi na e consecuencia di posibel negligencia di hospital. Algo cu e mandatario a tuma nan na malo, argumentando cu no por haci politica aworaki cu esaki y cu mester laga e departamentonan concerni haci nan trabou di investigacion.