Grupo di 7: Gobierno mester revoca medidanan impone y anuncia

ORANJESTAD – Un manifestacion cu mester a keda ‘pasivo’ diabierna atardi, a converti su mes rapidamente den un muestra di forza entre manifestantenan y polis, cu a termina cu riot comando y polisnan cu cacho tumando control pa por a domina e manifestantenan. Na final, prome minister Mike Eman a presenta (e prome biaha e la bin afo cu intencion di confronta tur hende, pero a wordo pusha paden bek mes lihe cu e la sali afo) den un forma calmo, papia cu no solamente Rocky Kelly (lider di e grupo di 7), pero tambe 3 miembro mas di e grupo y un sindicalista. Sin manifiesto na man, e peticion principal tabata pa gobierno ‘pone man na curazon’ y revoca medidanan impone y anuncia. Premier Mike Eman na su turno, a mustra cu ‘gobierno ta traha pa pueblo y ta tene pueblo na consideracion’ y a bolbe drenta bestuurskantoor. Y esey tabata e final di dos pa tres ora di un manifestacion cu por poco a bay for di man.

For di comienso di e manifestacion, tabatin indicacion cu esaki lo ta bay ta un manifestacion diferente. Pa varios motibo. Sindicatonan y partido MEP (oficialmente e biaha aki) a anuncia nan participacion. Esaki lo mester a percura pa mas hende sin mas. Segun testigonan ocular policial, tabatin visiblemente mas hende na banda tambe, compara cu e biahanan anterior. “Mi no ta bin cu manifiesto pasobra nos a hacie esey dos biaha caba y nan a cherche cu nos” Rocky Kelly a sigura NoticiaCla.com prome cu e la cuminsa su marcha pa bestuurskantoor. E ruta tabata mas cortico e biaha aki. For di dilanti ex cas di gobernador pa bestuurskantoor. E marcha mes, tabata uno trankil, pasivo, cu e gritonan di custumber y e bochincha cu ta parti di henter e asunto.

Na yegada di e grupo, a bira conoci mesora cu cos lo a bay diferente. “Esaki no ta loke nos a palabra” un Rocky Kelly visiblemente rabia a convoca na comisario di polis Trudy Hassell ora cu a tende cu e mester a topa premier Eman paden enbes di pafor. Cu tur pasenshi, Hassell a splica Kelly di e situacion, pero ya e grupo a cuminsa agita. Boternan di awa a cuminsa bula, y den un rato di ora, manifestantenan a cuminsa un pushamento di baricada contra polis. Den un rato di ora, grupo di riot comando a bin reforsa e polisnan. Pa un rato, esnan presente no tabata sa bon kico tabata pasando y a para wak den asombro. Un dama di edad a keda cu un cabes gekap, debi na un intercambio cu loke tabata parse polis. Pero esey no por a keda confirma pa NoticiaCla.Com.

Den un rato, premier Mike Eman a sali cu un velocidad for di e edificio di Bestuurskantoor, cla pa confronta e grupo y supuestamente papia cune. Pero manera cu e la sali, e la wordo enfrenta cu e grupo di manifestante basta agita. Mesora e personal di seguridad di premier Eman a pushe bek paden pa Bestuurskantoor pa asina evita mas problema. E situacion a keda agita, y poco poco trankilisa na un nivel aceptabel. Esey no a kita afo cu polis a manda mas refuerso den for di mas riot comando y e ekipo di K9 di polis. Algun manifestante no a aprecia e hecho cu polis kier a usa cacho pa controla e grupo di persona, aunke cu e cachonan a keda riba un distancia, observando e situacion di lew. Menos mal cu rapidamente e polisnan  presente tabatin e situacion bou di control.

Den un di dos intento, premier Eman a bolbe sali, topa cu e representantenan di e grupo di 7 y un sindicalista. E unico peticion, aparte di algun mensahe den direccion di e mandatario, tabata pa gobierno recapacita y revoca medidanan impone, anuncia y planea pa bin cune. Premier Eman a sigura esnan presente cu gobierno ta traha cu e pueblo den mente y cu lo percura pa sigui traha pa e comunidad. Cu esey e partidonan a sali for di otro, y e manifestacion a yega na un final. NoticiaCla.com a compronde cu e proximo manifestacion, esun cu partido MEP a yama, lo ta poni pa dia 1 di october proximo. Algo cu mester wordo confirma ainda.