Parlamento: Uni pa tin hospital renoba, pero dividi riba su gastonan

ORANJESTAD – Parlamentarionan ta mustra di ta uni riba e necesidad pa cu un expansion y renobacion di nos hospital, pero ta dividi riba con ta manehando e gastonan di e proyecto. Esaki, tabata e discussion awe mainta den Parlamento. Awe mainta a continua cu tratamento di e reunion publico # 5 parti 2, cu a cuminsa siman pasa diamars. E reunion inicial tabata pa trata tanto e status di minister demisionario Paul Croes y e costo extra di 80 miyon pa e hospital nobo/renoba. Pero mirando e tempo, no a logra pa trata e parti di hospital, pa cual esaki a continua awe mainta.

DEBATE

E reunion a cuminsa awe mainta cu discurso di varios parlamentario unda cu manera por a spera, esnan di e coalision ta cuestiona e forma con ta financiando esaki y e gastonan extra cu esaki lo a bin cune. Pa loke ta e parlamentarionan di e gobierno saliente, tabata boga pa e proyecto continua, y cu e proyecto no tabatin nada malo cune. E intencion ta pa e reunion continua durante dia y pa atardi e minister demisionario encarga Alex Schwengle, contesta tur pregunta cu a wordo haci den dia. Keda pendiente pa e resultado den curso di dia.